Rev 8 | KYG | STEP | Aikeli sipisipimo'a napa seveni kamemo alino ne'akaige'apae'mo koku'napi vaya'mogimo aise afina'atomo aise aovafi'mo ge osu'a afa'a mai'nae.

Revelation of John 8

Napa seveni kamemo alino akau'niya gemae

1 Aikeli sipisipimo'a napa seveni kamemo alino ne'akaige'apae'mo koku'napi vaya'mogimo aise afina'atomo aise aovafi'mo ge osu'a afa'a mai'nae. 2 Inagi agovana seveni'a enisole vaya'mo Goti aulagale'mo he ti'a mai'naya enisole vaya'mo alino apami'niya pikulimo alite'a mai'nage'na apake'nove.

3 Mago alu enisole vekamo'a goli yuvapafi'mo atamo kae'a ne'malaya yuvapamo aliteno ofalinimo ne'malaya hi'yalamute'mo eno he tino mai'niye. Mago vekamo'a asole ya'mo atafi'mo alino kae'nigeno alagepa atumo ne'aiya ya'mo alino enisole vekamo ami'niye. Muki apaote vaya'mogimo nunumu nehaya ge'api'e alagepa atumo ne'aiya ya'e'mo alino goli hi'yalamute'mo maleteno Goti'mo amisiyafe'mo alino ami'nigeno ali'niye. 4 Alino yuvapafi'mo male'neno'ae'mo atafi'mo kae'nigeno halinamo aiteno alagepa atumo ai'nigeno halina'e apaote vaya'mogi nunumu hu'naya ge'api'e'mo enisole vekamo ayapati'mo Gotitegamo magokepi'mo lokaeno hai'niye. 5 Inagi ani enisole vekamo'a yuvapamo aliteno hi'yalamuteti'mo atamo alino yuvapafi'mo maleno havai teteno alino ma mopafi'mo aino atagu faeno atale'nigeno hakalu hakalu huge alopa agemo aige hafosa hai'nigeno alino alave alave huge imima alige hu'niye.

Pikulimo hu'naya gemae

6 Hutege'apae'mo seveni'a enisole vaya'mogimo seveni'a pikulimo ali'ne'a pikulimo hisayafe'mo alo hu'a mai'nae. 7 Hogote enisole vekamo'a pikuli hu'nigeno'ae'mo ko aigekana huno ko mopagi atagi kolanagi huno ai'niye. Ma mopamo lole'e mago'e atupaleti'mo magokayaga atupa mopamo ago atamo'mo leno asagali'niye. Ani kava huno lole'e mago'e yosafati'mo magoke yosamo leno asagali'niye. Muki kahau'amo ago leno asagali'niye.

8 Napa tu enisole vekamo'a pikulimo hu'nigeno'ae'mo alopa avefi'mo atamo neleya avegana ya'mo alino yaga auno atale'nigeno solovala anipi'mo asagauno ai'niye. Solovala ani'mo lole'e mago'e atupaleti'mo magokayaga atupalegamo kola ani'mo hamale'niye. 9 Hamale'nige'a lole'e mago'e vaya'mo solovala anipi'mo mai'naya vayapati'mo magoke vaya'mo ago fali'nae. Asole sipifati'mo lole sipi'ala'mo ateno magoke sipimo alino hosu huno ateteno'ae'mo magoke sipimo alino hosu huno atete atete hulino u'niye.

10 Napa tali enisole vekamo'a pikuli hu'nigeno'ae'mo alopa kanefi'mo'a ata kani aegekana huno aeno ha le'nigeno'ae'mo koku'napi'mo lole'e mago'e anipati'mo magoke ani'mo nelamiya anipi'e magoke meti anipi'e'mo asagauno ai'niye. 11 Ani kanefi'mo agi'amo atu neheya yane. Lole'e mago'e anipati'mo magoke ani'mo'a atu he'nige'apae'mo asole vaya'mogi ani ani'mo nete'a ago fali'nae.

12 Napa fo enisole vekamo'a pikuli hu'nigeno'ae'mo lole'e mago'e yegemo atupaleti'mo magokayaga atupale'mo amagi'nigeno hani hu'niye. Ani kava huno lole'e mago'e kaimo atupaleti'mo magokayagamo atupale'mo hani hu'niye. Lole'e mago'e kanefipati'mo magoke kanefi'mo'a hani hu'niye. Felugamo lole afina'mo afa'a hane'nigeno magoke afina'mo hani hu'niye. Hani'ilagamo lole afina'mo afa'a hane'nigeno magoke afina'mo hani hu'niye.

13 Hutege'na agovana mago enisole vekamo'a koku'na'mo folagate'mo halelitata nehuno'ae'mo, aiye aiye, hu'niye. Lole'e mago'e enisole vaya'mogimo pikulimo nehisage'apae'mo ma mopafi vaya'mogimo kagegage hugae, huno hu'niye.